ಭೋಗದಾಸೆ

ತನ್ನದೇ ತಂದೆಯ
ತೊಡೆಯ ಮೇಲೆ
ಕೊಡಬೇಕೆಂಬ
ಭೋಗದ ಆಸೆ
ಕಟ್ಟಿ ಹಾಕಿತು
ಧ್ರುವನನ್ನು
ಧ್ರುವ ನಕ್ಷತ್ರಕ್ಕೆ
ಸಾವಿರಾರು ವರ್ಷ
ಇನ್ನೂ ಕಂಡ ಕಂಡದಕ್ಕೆ
ಆಸೆ ಪಡುವ
ನಮ್ಮ ಪಾಡೇನು?

ಆಧ್ಯಾತ್ಮ ಮತ್ತು ಅನುಭವ

ಸೀಮಿತ ಅನುಭವಗಳ
ಪರಿಧಿ ಮೀರಿ
ಜ್ಞಾನದ ಹೊಸ
ಪರ್ವತಗಳ ಏರಿ
ಅಂಧ ಶ್ರದ್ಧೆಯ
ಪ್ರಪಾತಕ್ಕೆ ಜಾರದೇ
ತನ್ನ ಅನುಭವಗಳ
ಪರಿಧಿ ಹಿಗ್ಗಿಸಿ
ಅನುಭವಿಸಿ ಅರಿತು
ನಡೆಯುವ ದಾರಿಯೇ
ಆಧ್ಯಾತ್ಮ

ತಾರತಮ್ಯ

ತಾರತಮ್ಯ ಅಡಗಿದೆ ಪ್ರಕೃತಿಯ
ಕಣ ಕಣದಲಿ
ಆದ ತೋರಿದವರು
ಗುರು ಮಧ್ವರೆ ಹೊರತು ಅದು
ಅವರ ಸೃಷ್ಟಿಯಲ್ಲ || ೧ ||

ತಾರತಮ್ಯವೇ ಇಲ್ಲ ಎಂದರೆ
ಹಸುಳೆಗೆ ತಾಯಿ ಹಾಲು
ತರುಣನಿಗೆ ಕಟಿ ರೊಟ್ಟಿ
ಮುದುಕನಿಗೆ ಮೆತ್ತಗಿನ ಅನ್ನ
ಏಕೆ? ತಿನಿಸು ಎಲ್ಲರಿಗೆ ಒಂದೇ ಆಹಾರವನು
ನೋಡಿಕೋ ಎಲ್ಲರನು ಒಂದೇ ರೀತಿ || ೨ ||

ತಾರತಮ್ಯವೇ ಇಲ್ಲ ಎಂದರೆ
ಅಧಿಕಾರಿಗೆ ಖಾಸಗಿ ಕೋಣೆ
ಗುಮಾಸ್ತನಿಗೆ ಬರಿ ಮೇಜು ಕುರ್ಚಿ
ಜವಾನ ಹೊರಗೆ ನಿಲ್ಲುವುದು
ಏಕೆ? ಕೂಡಿಸು ಎಲ್ಲರನು ಒಂದೆಡೆ
ಕೊಡು ಎಲ್ಲರಿಗೂ ಒಂದೇ ಸಂಬಳವನು|| ೩ ||

ತಾರತಮ್ಯವಿದೆ ಯೋಗ್ಯತೆಯಲಿ
ತಾರತಮ್ಯಕ್ಕೆ ಅನುಗುಣವಾಗಿ ವರ್ತನೆ
ನ್ಯಾಯವೇ ಹೊರತು ಅನ್ಯಾಯವಲ್ಲ
ತಾರತಮ್ಯವಿರದಿರುವುದು ಮಾನವೀಯತೆಯಲಿ ಮಾತ್ರ
ಮಾನವೀಯತೆ ಕಳೆದುಕೊಂಡು
ತಾರತಮ್ಯದ ಬಗ್ಗೆ ಬೊಬ್ಬೆ
ಹೊಡೆದರೇನು ಬಂತು? || ೪ ||

|| ಶ್ರೀ ಕೃಷ್ಣಾರ್ಪಣಮಸ್ತು ||

ಗುರು ಸತ್ಯಾತ್ಮ ತೀರ್ಥರ ಹಾಗೂ ಗುರು ಪ್ರಭಂಜನಾಚಾರ್ಯರ ಪ್ರವಚನದಿಂದ ಸ್ಪೂರ್ತಿ ಪಡೆದದ್ದು.
ತಪ್ಪು ತಿಳುವಳಿಕೆ ಇದ್ದರೆ ಅದು ನನ್ನದು ಮಾತ್ರ.

ಕನ್ಯಾ ದಾನ

ವಧುವಿನ ತಂದೆ ತಾಯಿ ಹೇಳಿ
ವರನ ತಂದೆ ತಾಯಿಗೆ
ಧನ್ಯವಾದಗಳು ತಮ್ಮ ಈ ಅನುಪಮ
ಆಸ್ತಿಯನ್ನು ಇಷ್ಟು ದಿವಸ
ನಮ್ಮ ಮನೆಯಲ್ಲಿ ಇಟ್ಟುಕೊಳ್ಳಲು
ಅವಕಾಶ ಮಾಡಿ ಕೊಟ್ಟದ್ದಕ್ಕೆ || ೧ ||

ವರನ ತಂದೆ ತಾಯಿ ಹೇಳಿ
ವಧುವಿನ ತಂದೆ ತಾಯಿಗೆ
ಧನ್ಯವಾದಗಳು ನಮ್ಮ ಈ  ಅತ್ಯಂತ
ಬೆಲೆ ಬಾಳುವ  ಸಂಪತ್ತನ್ನು
ಇಷ್ಟು ಚೆನ್ನಾಗಿ ರಕ್ಷಿಸಿ ಬೆಳಿಸಿ

ನಮಗೆ ಹಿಂತಿರುಗಿ ಕೊಟ್ಟಿದ್ದಕ್ಕೆ|| ೨ ||

ವಧುವನ್ನು ಕರೆದು ಕೊಂಡು ಹೋಗಿ
ವರನ ಮನೆಗೆ  ವಧು ತನ್ನದೇ ಮನೆಗೆ
ಹಿಂತಿರುಗಿ  ಬರುತ್ತಿರುವ ಹಾಗೆ
ಅದೆಷ್ಟು ಸುಂದರ ಮದುವೆಯ
ಪರಿಕಲ್ಪನೆ ವೈದಿಕ ಧರ್ಮದಲ್ಲಿ || ೩ ||

ತೊರವಿ ನರಸಿಂಹ

ನಮ್ಮೊಳಗಿನ ಹಿರಣ್ಯ ಕಶ್ಯಪು ಕೊಬ್ಬಿದ್ದಾನೆ
ಬಿದ್ದಿದ್ದಾನೆ ಹಿರಣ್ಯದ ಲೋಭದ ಹಿಂದೆ
ಕೇಳದಾಗಿದೆ ಪ್ರಹ್ಲಾದನ ಕರೆ ಆತನಿಗೆ
ನಾರಾಯಣನ ನಾಮವಿಲ್ಲ ನಾಲಗೆಯಲಿ || ೧ ||

ಮನದೊಳಗಿನ ಗಾಡಂಧಾಕಾರದ ಕಂಭ
ಸೀಳಿ ಬಾ ಉಗ್ರ ತೊರವಿ ನರಸಿಂಹನೇ
ಮಾಡು ದಮನ  ಹಿರಣ್ಯ ಕಶ್ಯಪುವನ್ನು
ಕೇಳುವಂತೆ ಮಾಡು ಪ್ರಹ್ಲಾದನ ಕರೆ || ೨ ||

ನಾಲಗೆಯಲಿ ನಲಿದಾಡಲಿ ನಿನ್ನ ನಾಮ
ಮಾಡು ದುಷ್ಟ ವಿಚಾರಗಳ ದಹನ
ಪ್ರೇರಿಸು ನಮ್ಮನು ನಡೆಯಲು ಸನ್ಮಾರ್ಗದಲಿ
ಕಾಪಾಡು ತ್ವರಿತವಾಗಿ ತೊರವಿ ನರಸಿಂಹನೇ  || ೩ ||
|| ಶ್ರೀ ಕೃಷ್ಣಾರ್ಪಣ ಮಸ್ತು ||

ಹನುಮ ಭೀಮ ಮಧ್ವ

ಹನುಮ ಹನುಮ ಹನುಮ
ಎಂದೊಡೆ ಬರುವದು ಬಲ ತಾಪತ್ರಯಗಳ ಭಾರ ಹೊತ್ತು
ದಾಟಲು ಸಂಸಾರ ಸಾಗರ || ೧ ||

ಭೀಮ ಭೀಮ ಭೀಮ
ಎಂದೊಡೆ ಬರುವದು ಬಲ ಅರಿಷಡ್ವ್ವರ್ಗಗಳ ಶತ್ರು
ಸೇನೆಯ ಸದೆಬಡಿದು ಜಯಿಸಲು || ೨ ||

ಮಧ್ವ ಮಧ್ವ ಮಧ್ವ
ಎಂದೊಡೆ ಬರುವದು ಬಲ ಅಜ್ಞಾನದ ಅಂಧಕಾರ ಕಳೆದು
ಸಾಧನೆಯ ದಾರಿ ಕ್ರಮಿಸಲು || ೩ ||

|| ಶ್ರೀ ಕೃಷ್ಣಾರ್ಪಣ ಮಸ್ತು ||

ಭೀಮ - ಧುರ್ಯೋಧನ

ಪ್ರತಿಯೊಬ್ಬರ
ಮನದಲ್ಲೂ
ಇದ್ದಾರೆ
ಒಬ್ಬ
ಧುರ್ಯೋಧನ
ಒಬ್ಬ
ಭೀಮಸೇನ || ೧ ||

ಮಾಡಿದ
ಸತ್ಕಾರ್ಯಗಳ
ಅಹಂಕಾರದಿಂದ
ಧುರ್ಯೋಧನ
ಹಿಗ್ಗದಿರಲಿ || ೨ ||

ಮಾಡಿದ
ದುಷ್ಕರ್ಮಗಳ
ಪಾಪ ಪ್ರಜ್ಞೆಯಿಂದ
ಭೀಮಸೇನ
ಕುಗ್ಗದಿರಲಿ || ೩ ||

ಭೀಮಸೇನನೇ
ಗೆಲ್ಲಲಿ
ಆದರೆ
ಧುರ್ಯೋಧನ
ಗೆದ್ದಾಗ
ಭೀಮಸೇನ
ಎದೆಗುಂದದಿರಲಿ || ೪ ||

|| ಶ್ರೀ ಕೃಷ್ಣಾರ್ಪಣ ಮಸ್ತು ||